标题：ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།

内容：
ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།ཕྱི་ན་འདུལ་བའི་སྤྱོད་པ་གཙང་སངས་ངེ།།ནང་ན་བྱང་སེམས་སྡོམ་པ་གཙང་སངས་ངེ།།གསང་བ་སྔགས་ཀྱི་དམ་ཚིག་གཙང་སངས་ངེ།།པདྨ་དཀར་པོ་འདྲ་བའི་གནས་བརྟན་ཞིག།ཞལ་རས་འཛུམ་གྱིས་གང་བ་འགྱུར་མ་མྱོང་།།ཁ་ཚིག་དོན་ལ་འཇུས་པ་འགྱུར་མ་མྱོང་།།དྲང་བདེན་ཚང་ཐིག་དཀར་པོ་འགྱུར་མ་མྱོང་།།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།ཁྲ་མོ་གླིང་གི་གཅེས་ཕྲུག་འདན་སྲས་ཀྱི།།བཀའ་ཡི་བློན་པོ་མཁྱེན་དཔྱོད་གཉིས་ལྡན་པ།།གདོང་གི་སྤྱི་དཔོན་རྒྱལ་པོའི་སྐུ་ཚབ་ཅིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།ཆོས་རྗེ་བླ་མ་ཞིང་ལ་མ་ཕེབས་གོང་།།འཁོར་ཚོགས་འདུ་བ་ཚོད་འཛིན་མ་བྱས་གོང་།།བསྟན་པ་ཕྱི་ནས་སྲུང་བའི་ལྕགས་རི་ཞིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།ཡང་དར་རྒྱལ་བསྟན་གསེར་གྱི་རྒྱལ་མཚན་ཆེ།།དགོང་དུ་འདེགས་མཁན་ཆོས་རྗེ་བླ་མ་དང་།།ལས་སྨོན་མཉམ་དུ་སད་པའི་དཔུང་རོགས་ཞིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།མི་མཐུན་གཡུལ་ལས་རྒྱལ་བའི་སྟོབས་ལྡན་ཁྱུང་།།འཛམ་གླིང་འཛིན་མའི་ཡང་རྩེར་འཕགས་པའི་ཚེ།།མཛད་བཟང་དགོང་དུ་འདེགས་པའི་སྒྲོ་ཉག་ཅིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།། བསྟན་སེལ་སྡེ་འཁྲུགས་སློང་བའི་ལག་དམར་དག།རིན་ཆེན་སྲོག་དང་བསྡོས་ནས་བསྐྲད་པའི་དུས།གོམ་གང་ཕྱིར་ནུར་མེད་པའི་མཆན་ཁེབ་ཅིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།མི་ཆོས་ལུགས་ཀྱི་ཕོ་རབ་མཛངས་མི་མཆོག།ལྷ་ཆོས་ལུགས་ཀྱི་དད་འདུན་མངོན་ལྐོག་བྲལ།།འགོ་བའི་ལྷ་ལྔའི་གཅེས་ཕྲུག་དར་མ་ཞིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།དབང་མདོག་འབྱམས་ཡིག་འཕྲུལ་གྱི་བྱ་མ་རྟ།།ཕྱོགས་མཐར་གར་དུ་བསྒྱུར་ཚེ་ཁ་ལོ་བ།།བཀའ་བཞིན་དང་དུ་ལེན་པའི་ཕོ་ཉ་ཞིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།མཐོ་ལ་ངོ་དགའ་དམན་ལ་ཆུང་བལྟས་དབེན།།དགྲ་གཉེན་སོ་སོར་འབྱེད་པའི་ཕྱོགས་ལྷུང་བྲལ།།ཀུན་ལ་དྲོད་ཁོལ་སྦྱིན་པའི་དྲང་སྲོང་ཞིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།སྔོན་ཞིག་ཁྲི་ཤོང་ཀུན་དགའ་ར་བ་རུ།།སྟོན་འཁོར་ལྷན་འཛོམས་དགའ་སྐྱིད་ཡོ་ལང་དུས།།རྣམ་བཞི་འཁོར་གྱི་དཀྱིལ་བཅུད་ཟུར་རྒྱན་ཞིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།རྣམ་དག་ཆོས་པའི་རང་ཚུགས་མ་ཤོར་ཞིང་།།སྒོ་གསུམ་སྦྱོར་བས་གཞན་སེམས་མ་དཀྲུག་པར།།མཁའ་ལྡིང་ཁྱུང་གི་ཐུགས་སྲས་དག་མ་ཞིག།།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།ཡ་གི་མཁན་སྤྲུལ་མ་གི་གྲྭ་རྐྱང་ཡན།ཀུན་ལ་མཁོ་བའི་དཔྱོད་ཤེས་གཉིས་ལྡན་པའི།།གལ་ཆེན་བློ་སྒོ་འབྱེད་པའི་ལྡེའུ་མིག་ཅིག།ཁྲི་ཕྲག་འདུས་པའི་ཞལ་ཚབ་རྗེས་སུ་དྲན།།བདེ་ལྡན་ཞིང་གི་རིག་འཛིན་འདུས་པའི་གྲལ།།ཆོས་རྗེ་འོད་མཚན་སྟོང་འབར་ཞབས་དྲུང་དུ།།ང་ཅག་ལྷན་འཛོམས་སྐལ་བཟང་དུས་སྟོན་ལ།།རོལ་བའི་ཡིད་ཆེས་སྙིང་གི་ཟབ་སར་གནས།།རེ་ཞིག་ཡུལ་དུས་རྣམ་པས་བསྐལ་ན་ཡང་།།དད་འདུན་གཅིག་ལ་འཁྲེང་བའི་རྟེན་འབྲེལ་དང་།།ཆོས་རྗེ་བླ་མའི་བདེན་ཚིག་ཟབ་མོའི་སྟོབས།།གང་ལ་བསམ་ཡང་མི་འབྲལ་འགྲོགས་པར་ངེས།།ཞེས་མཆེད་གྲོགས་དམ་པ་གང་ཉིད་ཞིང་གཞན་དུ་གཤེགས་པ་ལ་ཕངས་སེམས་ཀྱིས་རྐྱེན་གྱིས་གང་གི་རང་བཞིན་བློ་ལ་གང་དྲན་ཙམ་ཞིག་དད་པའི་ཀློང་ནས་ཡི་གེར་བྲིས།དྲེལ་འཁྱམས་ཆོས་དགས།2019 8 23 ལའོ།།

发布时间：2019-09-12 16:03:56
更新时间：2024-08-29 07:53:47
来源：素超人
链接：https://suchao.ren/wei-sushi-6145